數碼廣播簡介
而家我哋講得十分熱烈嘅「數碼廣播」或「數碼電視」，比較確切嘅名稱係數碼地面電視廣播（Digital terrestrial television broadcasting, DTTB），係指以數碼方式，透過大氣進行嘅電視廣播模式。所謂「地面」係同例如「有線」、「衛星」等廣播模式相對。而家Cable、NOW等有線電視已經用緊數碼方式傳送節目，佢哋其實都係以數碼方式傳送，即係已經係數碼廣播，但以無綫方式傳送嘅免費電視頻道，傾數碼化傾咗超過七年，到今年終於有眉目。為方便大眾理解，「數碼廣播」或「數碼電視」，其實就係指香港即將喺 2007 年 12 月 31 號夜晚 7 點鐘正式啟播嘅數碼地面電視廣播。
數碼電視好處
- 較低傳送成本
- 增強電視接收效果
- 支援新式傳送模式，例如 HDTV（高清電視），同埋多媒體/互動內容
- 每條頻道可以附帶更多內容
- 支援流動/便攜式接收
- 更靈活運用頻譜
- 配合現今數碼化製作模式
呢幾點係喺電訊管理局網頁照抄。對我地用戶而言，轉用數碼方式傳送，會見到以下轉變：
畫質
如果你平時收電視會受類比制式嘅鬼影、雪花 等接收不良效果影響，轉用數碼廣播後，就唔會有呢種問題。
當然，數碼廣播如果收得真係十分唔好，都仍會有收唔到（冇嘢睇）同窒格、起格等問題。不過數碼廣播可以喺環境較差情況，都有良好效果，即係話，只要你睇到嘢、冇窒格同起格，個畫面就一定同電視台發放出嚟嘅一模一樣，唔會有邊度收得好啲就會清啲嘅比較。
如果所處地區平時已經接收良好，數碼廣播引入嘅高清廣播同 16:9 闊螢幕模式，最適合而家新款電視。前者會有更精細嘅視覺享受，後者則更接近電影播放比例。
聲效
數碼廣播由於可以附帶更多內容，加上類比廣播係 N 年前產物，隨着技術進步，聲音效果亦能有所提升。而家類比制式，一係就雙聲道，一係就麗音，但麗音就即係一邊聲道一種語言，變相每條聲都只會係單聲道。
數碼廣播不但可以同時以雙語立體聲廣播，仲支援 AC-3 (Dolby Digital) 5.1 聲道。而喺雙語廣播時，可以做到多達 1 條立體聲 加 1 條 AC-3 5.1 聲道廣播。
其他功能
除此之外，數碼廣播亦起碼會有兩項功能：
- 電子節目表 (EPG)，唔使多講
- 隱藏字幕，即係好似 DVD 咁，唔使下下有條字幕喺下面阻住
服務
隨住數碼廣播開始，無綫同亞視各會有多一條頻道去提供新服務。無綫會開多 3 個台，亞視就會開多 5 個台，畀觀眾更多節目選擇。